Politisi Dapon Heuay

"Abah, badé milih Kang Dédé Yusup, Ceu Onéng, atanapi Ua Dédi Mijwar?" pananya Nyi Encar ngabagéakeun Bah Marjuki nu kakara mucunghul di lawang pawon.

"Hah, rék nongton sinétron, Nyi?" Bah Marjuki témbong rada kerung, "isuk-isuk bet kalahka nongton, mending ogé ngaroris kebon, Abah mah. Mana cikopi?"

"Ih, ari Abah, sanés badé ngajak nongton sinetron Encar mah, éta téh nami-nami anu tandang janten pamilon pamilihan gubernur...," Nyi Encar imut bari mindahkeun bekong ka hareupeun bapana. Cikopi panas téh ayeuna mah geus ngariung, milu rapat paripurna jeung goréng saroja, ogé rangginang nu gararing anyar meunang ngagoréng.

"Pilkada téa?" Suruput, suruput.

"Muhun, pamilihan gubernur, Abah," Nyi Encar rada mésem.

"Oooh, kutan...," Bah Marjuki ngahéhéh, laju pokna deui, "hempék waé atuh, lah, nu palalinter nu maraju mah. Hég sing jalujur!"

Nyi Encar neruskeun bébérés di dapur, bari teu poho ngasur-ngasurkeun suluh kana jero hawu. Cai dina langseng geus méh ngagulak. Sahéngna mah ti tatadi.

"Sakedap deui para pulitisi bakal réang nanawiskeun jagoanana, Bah. Jurkam ti partéy A ngajangjikeun kieu, ti partéy B ngajangjikeun kitu. Masih leuheung upami teu bari ngagogoréng calon sanés, éta téh, Bah...!"

"Lah, nya biasa waé atuh ari pulitik mah. Pan kitu lain ilaharna, Nyai?" Bah Marjuki tonggoy ngagayem rangginang garing, bari cumarita téh. Kres kres kres.

"Ceuk Machiavélli ogé, Nyi, 'the end justifies the means', pulitik mah nu penting ngarebut kakawasaan, deuleu!" Bah Marjuki ngajanggélék jadi guru pulitik nu keur nambahkeun piwulangna.

"Euleuh...," anakna hookeun, "geuning Abah uninga nu kararitu sagala? Saha Macapéli téh?"

"Ladang resep maca wéh Abah téh, Nyai. Moal éléh ku Nyai lah Abah ogé... hahahah," hampir wéh si Abah kabuhulan rangginang.

"Ah, Nyai mah sebel, politikus téh sok dapon heuay, asal ngagorowok, asal kontropérsial... asal janten berita... ari eusina mah hampos, taya hartina. Jéjétéjé, lah...!"

Anggota parlemen Cina teu wasa nahan calangap, mangsa jadi pamilon rapat dina raraga 'transper kakawasaan' ka generasi anyar dina partey komunis anu kumawasa. (dailymail)

Abah Marjuki nyuruput cikopi. Suruput, sakali deui, bangun anu ni'mat nakeranan. Laju ngarérét ka Nyi Encar nu geus diuk di hareupeunana, nungguan jawaban kawas nua nganti-nganti patwa MA. Dua korsi nu kahalangan méja buleud leutik di pawon téh kalan-kalan robah wujud jadi tempat diskusi pulitik ala tolkshow tipi.

"Nyai, pulitisi nu dapon heuay mah ngan aya di Cina. Jauh diditu! Aya buktina Abah ngomong kitu teh... Di urang mah tara aya nu dapon heuay! Rata-rata heuayna ditutup, da sieun kasamber kamera tipi jeung poto. Oge teu sakabeh pulitisi asbun, alias asal bunyi Nyi, aya oge nu masih boga hate nuraeni...," Bah Marjuki daria pisan.

"Ih, Abah mah aya ku angger nyebat wae Nuraeni Nuraeni..." Nyi Encar antara gemes jeung nyatujuan, "Bi Nuraeni nu di Ciheuleut tea nya? Lah, Encar ge terangng..."

"Hahaha..." Bah Marjuki nyakakak, "Teu satuju jadi gaganti Ambu kitu?"

"Ihhh, aliiimmmm...," Nyi Encar ngabirigidig, "Sanes teu panuju Abah gaduh garwa deui, da Ambu tos lami ngantunkeun, hawatos ka Abah... Tapi tong anu menorrRRR kitu atuh Abahh..."

"Hahaha... Teu kontropersial penampilanana mah atuh moal jadi sabiwir hiji di wewengkon Cibiuk ieu, Nyai..."

Anggota parlemen Cina teu wasa nahan calangap, mangsa jadi pamilon rapat dina raraga 'transper kakawasaan' ka generasi anyar dina partey komunis anu kumawasa. (naha asa anger siga keterangan poto nu tadi nya?) Ieu para anggota kongres teh keur ngabandungan pamingpin Cina Hu Jintao anu pidato salila 100 menit. (dailymail)

"Tapi Bah," Nyi Encar can cacap kabeh kapanasaran, "Geuning nu ngaguher wae oge aya di gedong parlemen teh? Malahan aya nu maen gim dina hapena waktosna rapat teh..."

"Oh, eta nu maen gim mah 'mengusir kejenuhan' tea, Nyai...," si Abah seuri leutik, "Nu ngaguher oge boa cape teui rapat nepi ka subuh... Ceunah tage..."